Unanimously tinanggihan ng Exor ang $1.3 billion na alok ni Tether para bilhin ang Juventus football club

Ang higanteng stablecoin na Tether ay nag-alok ng $1.3 bilyon para bilhin ang Italian football club na Juventus ngunit tinanggihan ito sa loob lamang ng 24 oras matapos muling ipahayag ng pamilyang Agnelli ng Italy, sa pamamagitan ng kanilang holding company na Exor, ang kanilang paninindigang hindi ibebenta ang anumang bahagi ng koponan. 

"Ang Exor ay muling kinukumpirma ang dati at tuloy-tuloy nitong mga pahayag na wala itong intensyon na ibenta ang alinman sa mga shares nito sa Juventus sa kahit anong ikatlong partido, kabilang ngunit hindi limitado sa Tether na nakabase sa El Salvador," ayon sa pahayag ng Exor board.  

Ang pagtanggi ay dumating agad matapos ipinahayag ng Tether ang kanilang binding all-cash bid nitong Biyernes, kung saan nag-alok ito ng €2.66 kada share para sa 65.4% controlling stake ng Exor—na humigit-kumulang 21% premium sa closing price ng Juventus na €2.19 noong Biyernes. Tinatayang nasa €1.1 bilyon ($1.3 bilyon) ang halaga ng club batay sa alok. Tulad ng naunang iniulat ng The Block, nangako ang Tether na mag-iinvest pa ng karagdagang €1 bilyon para sa pag-unlad ng club kung naaprubahan ang acquisition. 

“Para sa akin, ang Juventus ay palaging bahagi ng aking buhay,” ayon kay Tether CEO Paolo Ardoino sa isang pahayag noon. “Lumaki ako kasama ang koponang ito. Bilang bata, natutunan ko kung ano ang ibig sabihin ng dedikasyon, katatagan, at responsibilidad sa panonood kung paano hinarap ng Juventus ang tagumpay at pagsubok nang may dignidad."

Unang bumili ang Tether ng minority stake sa football club noong Pebrero, at tinaasan ito ng higit 10% noong Abril. Sinabi ni Ardoino na tutulungan ng partnership ang Tether upang "mag-explore ng mga paraan para sa makabagong kolaborasyon at potensyal na baguhin ang global sports landscape" ayon din sa kanyang pahayag noon. Suportado rin ng Tether si Dr. Francesco Garino bilang kandidato sa Juventus board; sumali siya sa board noong Nobyembre. 

Ang nabigong bid ay nangangahulugan ng kabiguan para sa diskarte ng Tether na mag-diversify lampas sa pangunahing negosyo nito sa stablecoin. Ang kumpanya, na nagtala ng netong kita na lumampas sa $10 bilyon sa unang siyam na buwan ng 2025, ay agresibong namumuhunan sa artificial intelligence, robotics, bitcoin mining, at iba pang sektor. Nitong nakaraang linggo lang, sumali ang Tether sa €70 milyong funding round para sa Italian humanoid robotics startup na Generative Bionics.

Ang Juventus ay paulit-ulit na humarap sa mga hamon sa pananalapi nitong mga nakaraang taon, nangangailangan ng mahigit €1 bilyon na kapital na ininject sa nakalipas na pitong taon. Sa kabila ng mga pagsubok na ito, walang ipinakitang kagustuhan ang pamilyang Agnelli na isuko ang kontrol. Hindi agad tumugon ang Tether sa request for comment ng The Block.